Кадрлар бўйича масъуллар учун очиқ мулоқот ташкил этилди

Давлат хизматини ривожлантириш агентлиги Самарқанд вилояти филиали ташаббуси билан жорий йилнинг 27 июль куни Самарқанд шаҳар ҳокимлигида давлат органлари ва ташкилотларининг ҳудудий бўлимлари кадрлар хизмати раҳбарлари ва ходимлари учун очиқ мулоқот ташкил этилди. Ушбу очиқ мулоқотда 45 дан зиёд Самарқанд шаҳридаги давлат органлари ва муассасаларининг кадрларга масъул вакиллари ва ходимлари иштирок этишди.

Унда Давлат хизматини ривожлантириш агентлиги вилоят филиали масъул ходими Ф.Ахатов очиқ танловлар ва танлов жараёнида юзага келаётган муаммо ва ушбу муаммоларни бартараф этиш юзасидан кадрлар хизмати масъулларига тўлиқ тушунчалар бериб ўтди. Бугунги кунда очиқ танловларга киритилган ўзгаришлар, тизимдаги янгиликлар тўғрисида батафсил тўхталиб, тизимнинг ишлаш принципларини иштирокчиларга кўрсатиб ўтишди. Бундан ташқари ягона миллий меҳнат тизими айнан вакант лавозимларга очиқ мустақил танловлар ўтказиб келаётган ташкилотлар ҳамда танловларга ҳужжат топшираётган номзодлар учун ҳам аҳамиятли бўлгани, ушбу тизим кадрларнинг ягона базаси эканлигини инобатга олиб, унда учраётган камчиликлар ва уларни бартараф этиш чоралари тўғрисида сўз юритилди. Очиқ мулоқот давомида иштирокчилар аризаларни қабул қилиш, малака талабларини ўрганиш муддатлари ҳамда тест ва суҳбат босқичлари юзасидан билдирилган саволларига жавоб олишди.

“Бу каби очиқ мулоқотларни ташкил этишдан кўзланган асосий мақсад очиқ танловларни ташкил этиш ва ўтказишда юзага келаётган муаммоли вазиятларга ечим топиш ҳамда кадрлар хизмати масъулларининг саволларига жавоб беришдан иборатдир. Мулоқот давомида бугунги кунда vacancy.argos.uz платформасида фуқароларга яратилган қулайликлар тўғрисида, шунингдек, тизимнинг имкониятлари бўйича ҳам батафсил маълумот бериб ўтдик. Бу масъулларга албатта келгуси фаолиятлари учун фойдали бўлади деган умиддамиз”-деди Агентлик филиали масъул ходими Б.Юлдошева.

Ушбу очиқ мулоқот давомида кадрлар хизмати масъулларига айнан бугунги кунда долзарб бўлган, амалиётда кўп учрайдиган ва кўплаб саволлар келиб чиқишига сабаб бўлаётган муаммоларнинг ечими бўйича тавсиялар берилди.

Очиқ мулоқот якунида бу каби амалиётни туман (шаҳар) лар кесимида нафақат кадрлар хизмати раҳбарлари учун балки ҳужжат топшираётган номзодлар учун ҳам доимий ўтказиш бўйича келишиб олинди.