Kashtachilik – O‘zbekiston amaliy-bezak san’ati turlari orasida eng qadimiysi hisoblanadi. O‘zbek kashtalari noyobligi, go‘zalligi, bezak-naqshlari va texnik usullarining ko‘pligi bilan ajralib turadi.
Piru badavlat momolarimizdan bizga meros bo‘lib kelayotgan amaliy bezak turlarining eng qadimiy va keng tarqalgan turi kashtachilikdir. Har bir qatim ipakka jon baxshida etib, dil tuyg‘ularini go‘yo bejirim gullar jilosiga ulab, ko‘z-ko‘z etayotgan qiz-juvonlarning nozik barmoqlari chindan-da moʻjiza yaratmoqda. Ha, xalqning hayoti va urf-odatlari bilan chambarchas bog‘liq bo‘lgan bu san’at turi qo‘li gul chevarlar tomonidan asrlar osha yanada sayqallanib kelinmoqda.
Xalq kashtachiligini o‘ziga xos san’at, hunar sifatida o‘rganish esa hozirgi zamon talablaridan biridir.
Bugun Samarqand shahridagi Turizm akademiyasida   shahar hokimligi,  Oila va xotin qizlar qo‘mitasi, Respublika Ma’naviyat va ma’rifat markazi Samarqand shahar bo‘linmasi, Samarqand davlat pedagogika instituti,  Respublika "Hunarmand"  uyushmasi Samarqand viloyat boshqarmasi hamkorligida  "Samarqand kashtachiligi ilmiy-amaliy  maktabini rivojlantirish masalalari" ga bag‘ishlangan ilmiy-amaliy konferensiya o‘tkazildi.
Unda Oliy majlis Qonunchilik palatasi deputati Z. Rahmonova,  Samarqand viloyat hokimi o‘rinbosari Z. Saidova,  Samarqand davlat pedagogika instituti olimalari G. Maxkamova,   S. Kadirova,  Samarqand shahar hokimi o‘rinbosari R. Toshniyozovalar so‘zga chiqishib, ma’naviy merosimiz -Samarqand kashtachiligi tarixi, rivojlanishi va istiqbollari  haqida so‘z yuritdilar. 
Shuningdek, tadbirda Samarqand shahar Oila va xotin-qizlar bo‘limi,  Respublika Ma’naviyat va ma’rifat markazi Samarqand shahar bo‘linmasi,  Respublika 
"Hunarmand" uyushmasi viloyat boshqarmasi,  Samarqand davlat pedagogika instituti o‘rtasida Moddiy-madaniy, ma’naviy merosimizni asrash va kashtachilik, hunarmandchilikni rivojlantirish haqida hamkorlik memorandumi imzolandi. 
Tadbirda amaliy san’at namunalaridan ko‘rgazma tashkil qilindi. Shuningdek,  ishtirokchilar Turizm akademiyasi kutubxonasi bilan ham tanishdi.