Unda Samarqand shahar IIB Yo‘l harakati xavfsizligi boshqarmasi boshlig‘i Z.Axmedov va shahar obodonlashtirish boshqarmasi boshlig'i o'rinbosari Sh.Suyunovning hisoboti tinglandi.

Kun tartibidagi ilk masala yuzasidan ma'lumot berilishicha hisobot davri mobaynida shaharning serqatnov yo‘llari mavsumiy ko‘rikdan o‘tkazilib, transport vositalari qatnovini tartibga solish maqsadida jami 588 dona yetishmaydigan yangi yo‘l belgilari o‘rnatilgan, 24 dona eskirgan yo‘l belgilari almashtirilgan, 26 ta piyodalar o'tish joyi qayta tiklangan.

— Joriy yilning o'tgan 2 oyida jami yo‘l-transport hodisasi sodir etgan haydovchilarning yoshi bo‘yicha tahlil qilinganda ularning 6 nafari 18 yoshdan 25 yoshgacha bo‘lganlar, 3 nafari 25 yoshdan 35 yoshgacha, 6 nafarini 35 yoshdan 45 yoshgacha bo‘lgan haydovchilar ekanligi aniqlangan, — deb ta'kidladi Z.Axmedov

Shuningdek “Yo‘l harakati xavfsizligi” to‘g‘risidagi qonun talablari asosida yuklatilgan vazifalarni ijrosini ta’minlashga mas’uliyatsizlik bilan yondoshgan korxona, tashkilotlarning  5 nafar mas’ul rahbarlariga nisbatan Ma'muriy Javobgarlik to'g'risidagi Kodeksning 147 va 196-moddalari bilan ma’muriy bayonnomalar rasmiylashtirilib, mavjud kamchiliklarni bartaraf etish yuzasidan mutasaddi tashkilotlarga taqdimnomalar kiritilgan.

Deputatlar mavzu yuzasidan o'z okrugidagi muammolar haqida ma'lumot berishdi. Shuningdek deputatlik guruhining telegram messenjeridagi murojaat botiga kelib tushgan bir nechta murojaatlar ko'rib chiqilib, ularni bartaraf qilish borasida fikr almashildi.

Kun tartibidagi 2-masala yuzasidan shahar hokimligi obodonlashtirish boshqarmasi boshlig‘i o‘rinbosari Sh.Suyunovning ma’ruzasida shahardagi nazoratsiz hayvonlarni tutish bo‘yicha o‘tgan davrda 2750 bosh daydi itlar tutib keltirilgan. Shundan, o‘z egalari va ixtiyoriy talabgorlar tomonidan olib ketilishi hamda kasal itlarni belgilangan tartibda zararsizlantirilishidan keyin bugungi kunda 2643 ta itlar maxsus itlarni saqlash joyida boqib kelinayotganligi qayd etilgan.

2025-yil 1-choragida boshqarmaga 307 ta har xil mazmundagi murojaatlar kelib tushgan bo‘lib, shulardan 283 donasi qonun doirasida ijobiy hal etilgan, 24 tasi ijro uchun mas'ul tashkilotlarga jo‘natilgan. Boshqarma tomonidan 18 km ichki yo‘llar ta’mirlangan va yo‘llardagi mavjud chuqurliklarga asfalt qoplamasi yotqizilgan.

Eshituv yakunida Sh.Suyunov deputatlar tomonidan berilgan savollarga yetarli darajada javob bera olmaganligi sababli mazkur masala keyingi eshituvda muhokama etish uchun qoldirildi.